میں کیا کہوں کہ تری چشم التفات نہیں

میں کیا کہوں کہ تری چشم التفات نہیں

حیات شوق پہ طاری غم حیات نہیں

جو دل پہ گزریں محبت کے خاص لمحوں میں

حدود شرح و بیاں میں وہ واقعات نہیں

غم دوام محبت ہے تشنۂ معنی

فنا کے بعد اگر منزل حیات نہیں

ترے بغیر بھی احساس زیست ہے لیکن

تڑپ میں درد کی وہ شورش حیات نہیں

مقام بے خودی عشق اے معاذ اللہ

میں اس جگہ ہوں جہاں مجھ کو ہوش ذات نہیں

نگاہ دوست تری دل نوازیاں معلوم

خطا معاف میں خواہان التفات نہیں

جمال تک ہی نہ محدود رکھ نظر مانیؔ

کہ عاشقی کی یہی ساری کائنات نہیں