main kya karun ki nahin dil pe iKHtiyar mujhe

maiñ kyā karūñ ki nahīñ dil pe iḳhtiyār mujhe

vagarna terī mohabbat hai nāgavār mujhe

na din ko chain na rātoñ ko hai qarār mujhe

bas ab to rahne de tanhā ḳhayāl-e-yār mujhe

lipaT ke so ga.iiñ sāhil se jab thakī maujeñ

vo yaad aa.e sar-e-shām baar baar mujhe

maiñ thak chalā huuñ ġham-e-zindagī kī rāhoñ meñ

kahāñ hai ai ġham-e-jānāñ zarā pukār mujhe

nikal gayā huuñ bahut duur manzil-e-dil se

pukārtī hai magar terī rahguzār mujhe

bhare haiñ zaḳhm-e-mohabbat baḌī musībat se

ilāhī dekh ke un ko na aa.e pyaar mujhe

na koī aisī tavaqqo na rasm-o-rāh-e-payām

na jaane kyuuñ hai tire ḳhat kā intizār mujhe

main kya karun ki nahin dil pe iKHtiyar mujhe

wagarna teri mohabbat hai nagawar mujhe

na din ko chain na raaton ko hai qarar mujhe

bas ab to rahne de tanha KHayal-e-yar mujhe

lipaT ke so gain sahil se jab thaki maujen

wo yaad aae sar-e-sham bar bar mujhe

main thak chala hun gham-e-zindagi ki rahon mein

kahan hai ai gham-e-jaanan zara pukar mujhe

nikal gaya hun bahut dur manzil-e-dil se

pukarti hai magar teri rahguzar mujhe

bhare hain zaKHm-e-mohabbat baDi musibat se

ilahi dekh ke un ko na aae pyar mujhe

na koi aisi tawaqqo na rasm-o-rah-e-payam

na jaane kyun hai tere KHat ka intizar mujhe