main kyun zaban se wafa ka yaqin dilaun tumhein

maiñ kyuuñ zabāñ se vafā kā yaqīñ dilā.ūñ tumheñ

tum āzmāo mujhe aur maiñ āzmā.ūñ tumheñ

maiñ bhūlne ko to ik pal meñ bhuul jā.ūñgā

ye sochtā huuñ kahīñ maiñ na yaad aa.uuñ tumheñ

mirī ġhazal hai mirī kaifiyat kā ā.īna

ab aur hāl-e-dil-e-zār kyā sunā.ūñ tumheñ

mirī taraf se sadā bad-gumāñ rahe ho tum

qarīb aao to maiñ kyā huuñ ye batā.ūñ tumheñ

kuchh aisā lutf hai us rūThne manāne meñ

hazār baar bhī rūTho to maiñ manā.ūñ tumheñ

merī nigāh meñ kuchh is tarah samā jaao

nigāh ḳhud pe bhī Dāloñ agar to paañv tumheñ

ye aarzū hai mirī shā.irī meñ Dhal jaao

ġhazal ke ruup meñ har lamha gungunā.ūñ tumheñ

mujhe yaqīñ hai ki tasvīr un kī pāoge

maiñ 'ehtishām' jo dil chiir ke dikhā.ūñ tumheñ

main kyun zaban se wafa ka yaqin dilaun tumhein

tum aazmao mujhe aur main aazmaun tumhein

main bhulne ko to ek pal mein bhul jaunga

ye sochta hun kahin main na yaad aaun tumhein

meri ghazal hai meri kaifiyat ka aaina

ab aur haal-e-dil-e-zar kya sunaun tumhein

meri taraf se sada bad-guman rahe ho tum

qarib aao to main kya hun ye bataun tumhein

kuchh aisa lutf hai us ruThne manane mein

hazar bar bhi ruTho to main manaun tumhein

meri nigah mein kuchh is tarah sama jao

nigah KHud pe bhi Dalon agar to panw tumhein

ye aarzu hai meri shairi mein Dhal jao

ghazal ke rup mein har lamha gungunaun tumhein

mujhe yaqin hai ki taswir un ki paoge

main 'ehtisham' jo dil chir ke dikhaun tumhein