main laDkhaDaya to mujhko gale lagane lage

maiñ laḌkhaḌāyā to mujh ko gale lagāne lage

gunāhgār bhī merī hañsī uḌāne lage

mirī qadīm rivāyat ko āzmāne lage

muḳhālifīn bhī ab kashtiyāñ jalāne lage

dil-e-harīs se ta.amīr kī havas na ga.ī

vo sat.h-e-āb pe kāġhaz kā ghar banāne lage

kisī kī rāh-e-munavvar meñ mo.ajaza ye huā

hamāre naqsh-e-kaf-e-pā bhī jagmagāne lage

na jaane kis kā hameñ intizār rahne lagā

ki tāq-e-dil pe diyā roz ham jalāne lage

hue kuchh itne mohazzab ki saañs ghuTne lagī

junūñ-pasand gale tak baTan lagāne lage

jinhoñ ne kāñToñ pe chalnā hameñ sikhāyā thā

hamārī raah meñ vo phuul ab bichhāne lage

shurūa ho gayā āñkhoñ meñ jashn-e-ḳhush-ḳhvābī

huī jo raat to har samt shāmiyāne lage

main laDkhaDaya to mujh ko gale lagane lage

gunahgar bhi meri hansi uDane lage

meri qadim riwayat ko aazmane lage

muKHalifin bhi ab kashtiyan jalane lage

dil-e-haris se tamir ki hawas na gai

wo sath-e-ab pe kaghaz ka ghar banane lage

kisi ki rah-e-munawwar mein moajaza ye hua

hamare naqsh-e-kaf-e-pa bhi jagmagane lage

na jaane kis ka hamein intizar rahne laga

ki taq-e-dil pe diya roz hum jalane lage

hue kuchh itne mohazzab ki sans ghuTne lagi

junun-pasand gale tak baTan lagane lage

jinhon ne kanTon pe chalna hamein sikhaya tha

hamari rah mein wo phul ab bichhane lage

shurua ho gaya aankhon mein jashn-e-KHush-KHwabi

hui jo raat to har samt shamiyane lage