main lamha lamha nae apne KHadd-o-Khaal mein tha

maiñ lamha lamha na.e apne ḳhadd-o-ḳhāl meñ thā

ki jo bhī kuchh thā maiñ apnī shikast-e-hāl meñ thā

nazar paḌā to vo aise na dekhā ho jaise

vo aks aks thā aur apne hī jamāl meñ thā

tire ḳhayāl se maiñ is qadar huā mānūs

tū sāmne thā magar maiñ tire ḳhayāl meñ thā

shikast-o-reḳht ne hī mujh ko ḳhud-kafīl kiyā

thā zaḳhm zaḳhm magar apne indimāl meñ thā

tumhāre va.ade se sadiyoñ kī umr le aayā

jo lamha qurbat-o-dūrī ke ittisāl meñ thā

main lamha lamha nae apne KHadd-o-KHal mein tha

ki jo bhi kuchh tha main apni shikast-e-haal mein tha

nazar paDa to wo aise na dekha ho jaise

wo aks aks tha aur apne hi jamal mein tha

tere KHayal se main is qadar hua manus

tu samne tha magar main tere KHayal mein tha

shikast-o-reKHt ne hi mujh ko KHud-kafil kiya

tha zaKHm zaKHm magar apne indimal mein tha

tumhaare wade se sadiyon ki umr le aaya

jo lamha qurbat-o-duri ke ittisal mein tha