main lauh-e-arz pe nazil hua sahifa hun

maiñ lauh-e-arz pe nāzil huā sahīfa huuñ

diloñ pe sabt huuñ peshāniyoñ pe likkhā huuñ

purānī rut mirā muzhda sunā ke jaatī hai

na.ī rutoñ ke jilau meñ sadā utartā huuñ

maiñ kaun huuñ mujhe sab pūchhne se Darte haiñ

maiñ roz ek na.e karb se guzartā huuñ

maiñ ek zinda haqīqat huuñ kaun jhuTlā.e

jo hoñT band raheñ aañkh se chhalaktā huuñ

khulī havā meñ jo aa.uuñ to raakh ban jā.ūñ

abhī maiñ zer-e-zamīñ huuñ magar ubaltā huuñ

kisī tarah to saveroñ kī aañkh khul jaa.e

maiñ shahr shahr meñ sūraj uThā.e chaltā huuñ

main lauh-e-arz pe nazil hua sahifa hun

dilon pe sabt hun peshaniyon pe likkha hun

purani rut mera muzhda suna ke jati hai

nai ruton ke jilau mein sada utarta hun

main kaun hun mujhe sab puchhne se Darte hain

main roz ek nae karb se guzarta hun

main ek zinda haqiqat hun kaun jhuTlae

jo honT band rahen aankh se chhalakta hun

khuli hawa mein jo aaun to rakh ban jaun

abhi main zer-e-zamin hun magar ubalta hun

kisi tarah to saweron ki aankh khul jae

main shahr shahr mein suraj uThae chalta hun