main lauT aaun kahin tu ye sochta hi na ho

maiñ lauT aa.uuñ kahīñ tū ye sochtā hī na ho

ki raat der ga.e terā dar khulā hī na ho

nahīñ ki ziist se kuchh vāsta paḌā hī na ho

maiñ kaise mānūñ tirā dil kabhī dukhā hī na ho

talāsh kar use dīvār-o-dar ke chehroñ meñ

ajab nahīñ tirī mahfil se vo uThā hī na ho

ik e'timād-e-vafā hai ki jī rahā huuñ maiñ

ki mere haal kā shāyad use pata hī na ho

ye rāsta to usī dar pe jā ke ruktā thā

ki vo ḳhafā hai to ye rāsta muḌā hī na ho

maiñ yūñhī us se ḳhafā huuñ magar mujhe Dar hai

manāne vaalā haqīqat meñ ḳhud ḳhafā hī na ho

mujhe to tujh pe ḳhud apnā gumāñ guzartā hai

tirā thakā huā lahja mirī duā hī na ho

gunāh aur hasīñ, ahrman ke bas meñ nahīñ

sitam-zarīf koī banda-e-ḳhudā hī na ho

maiñ sochtā huuñ ki āp-apnī dushmanī kyā hai

mirā vajūd mirī zaat se judā hī na ho

baḌe-baḌoñ ke nasheb-o-farāz dekhe haiñ

koī mile to sahī jis kā sar jhukā hī na ho

na jaane kitne haiñ sayyārgān-e-nā-dīda

tū intihā jise kahtā hai ibtidā hī na ho

vo laakh ġham sahī aisā nahīñ ye duniyā hai

ki 'shāz' us se bichhaḌ kar kabhī hañsā hī na ho

main lauT aaun kahin tu ye sochta hi na ho

ki raat der gae tera dar khula hi na ho

nahin ki zist se kuchh wasta paDa hi na ho

main kaise manun tera dil kabhi dukha hi na ho

talash kar use diwar-o-dar ke chehron mein

ajab nahin teri mahfil se wo uTha hi na ho

ek e'timad-e-wafa hai ki ji raha hun main

ki mere haal ka shayad use pata hi na ho

ye rasta to usi dar pe ja ke rukta tha

ki wo KHafa hai to ye rasta muDa hi na ho

main yunhi us se KHafa hun magar mujhe Dar hai

manane wala haqiqat mein KHud KHafa hi na ho

mujhe to tujh pe KHud apna guman guzarta hai

tera thaka hua lahja meri dua hi na ho

gunah aur hasin, ahrman ke bas mein nahin

sitam-zarif koi banda-e-KHuda hi na ho

main sochta hun ki aap-apni dushmani kya hai

mera wajud meri zat se juda hi na ho

baDe-baDon ke nasheb-o-faraaz dekhe hain

koi mile to sahi jis ka sar jhuka hi na ho

na jaane kitne hain sayyargan-e-na-dida

tu intiha jise kahta hai ibtida hi na ho

wo lakh gham sahi aisa nahin ye duniya hai

ki 'shaz' us se bichhaD kar kabhi hansa hi na ho