main manzar hun pas-e-manzar se mera rishta bahut

maiñ manzar huuñ pas-e-manzar se merā rishta bahut

āḳhir merī peshānī par sūraj chamkā bahut

jaane kaun se ism-e-anā ke ham zindānī the

tere naam ko le kar ham ne ḳhudā ko chāhā bahut

un se kyā rishta thā vo kyā mere lagte the

girne lage jab peḌ se patte to maiñ royā bahut

kaisī masāfat sāmne thī aur safar thā kaisā lahū

maiñ ne us ko us ne mujh ko muḌ ke dekhā bahut

kis ke dast-e-savāl meñ hai ik lambī chup kā charāġh

jhāñktā hai kyuuñ ik khiḌkī se koī chehra bahut

hai dariyā ke lams pe nāzāñ ik kāġhaz kī naav

sūraj se bāteñ kartā hai ek darīcha bahut

saarī umr kisī kī ḳhātir suulī pe laTkā rahā

shāyad 'tūr' mere andar ik shaḳhs thā zinda bahut

main manzar hun pas-e-manzar se mera rishta bahut

aaKHir meri peshani par suraj chamka bahut

jaane kaun se ism-e-ana ke hum zindani the

tere nam ko le kar hum ne KHuda ko chaha bahut

un se kya rishta tha wo kya mere lagte the

girne lage jab peD se patte to main roya bahut

kaisi masafat samne thi aur safar tha kaisa lahu

main ne us ko us ne mujh ko muD ke dekha bahut

kis ke dast-e-sawal mein hai ek lambi chup ka charagh

jhankta hai kyun ek khiDki se koi chehra bahut

hai dariya ke lams pe nazan ek kaghaz ki naw

suraj se baaten karta hai ek daricha bahut

sari umr kisi ki KHatir suli pe laTka raha

shayad 'tur' mere andar ek shaKHs tha zinda bahut