main muntazir hun tu kar hijr ka gila to sahi

maiñ muntazir huuñ tū kar hijr kā gila to sahī

guzāre kaise shab-o-roz ye batā to sahī

maiñ ham-qadam hī nahīñ ham-safar bhī huuñ terī

maiñ apnā haath baḌhā.ūñgī laḌkhaḌā to sahī

pighal na jā.ūñ tire jazboñ kī tapish se maiñ

nigāheñ apnī mire chehre se haTā to sahī

lihāz pichhle ta'alluq kā us ne kuchh to kiyā

mirī sadā pe vo pal bhar ko hī rukā to sahī

maiñ apne she'roñ ke paikar meñ un ko Dhālūñgī

tū apnā hāl-e-ġham-e-dil kabhī sunā to sahī

talab nahīñ na.e qaul-o-qarār kī mujh ko

kiyā thā mujh se jo vā'da kabhī nibhā to sahī

maiñ kaise kah duuñ ki ulfat meñ kuchh nahīñ paayā

milā na vo na sahī us kā ġham milā to sahī

main muntazir hun tu kar hijr ka gila to sahi

guzare kaise shab-o-roz ye bata to sahi

main ham-qadam hi nahin ham-safar bhi hun teri

main apna hath baDhaungi laDkhaDa to sahi

pighal na jaun tere jazbon ki tapish se main

nigahen apni mere chehre se haTa to sahi

lihaz pichhle ta'alluq ka us ne kuchh to kiya

meri sada pe wo pal bhar ko hi ruka to sahi

main apne she'ron ke paikar mein un ko Dhaalungi

tu apna haal-e-gham-e-dil kabhi suna to sahi

talab nahin nae qaul-o-qarar ki mujh ko

kiya tha mujh se jo wa'da kabhi nibha to sahi

main kaise kah dun ki ulfat mein kuchh nahin paya

mila na wo na sahi us ka gham mila to sahi