main musafir saba ki rahon ka

maiñ musāfir sabā kī rāhoñ kā

bojh uThā.e hue gunāhoñ kā

ruuh kā zaḳhm ek tīkhī yaad

naqsh bhūlī huī nigāhoñ kā

shaam se sub.h tak pighaltī raat

silsila be sadā karāhoñ kā

kaale taḳhtoñ pe sar paTaktā din

ek mā'mūl dars-gāhoñ kā

zindagī to sharāb-ḳhāne kī

nuur chehre pe ḳhānqāhoñ kā

ek nashsha havas kī āñkhoñ meñ

ik tamāsha barahna bāñhoñ kā

narm narm uñgliyāñ havāoñ kī

khurdurā jism shāh-rāhoñ kā

tarz-e-iz.hār kā anokhā-pan

ek andāz kaj-kulāhoñ kā

mo'tabar shahr shahr meñ 'qaisar'

sach ḳharīde hue gavāhoñ kā

main musafir saba ki rahon ka

bojh uThae hue gunahon ka

ruh ka zaKHm ek tikhi yaad

naqsh bhuli hui nigahon ka

sham se subh tak pighalti raat

silsila be sada karahon ka

kale taKHton pe sar paTakta din

ek ma'mul dars-gahon ka

zindagi to sharab-KHane ki

nur chehre pe KHanqahon ka

ek nashsha hawas ki aankhon mein

ek tamasha barahna banhon ka

narm narm ungliyan hawaon ki

khurdura jism shah-rahon ka

tarz-e-izhaar ka anokha-pan

ek andaz kaj-kulahon ka

mo'tabar shahr shahr mein 'qaisar'

sach KHaride hue gawahon ka