main na hunga kabhi tujhse but-e-ayyar juda

maiñ na hūñgā kabhī tujh se but-e-ayyār judā

aag patthar se nahīñ hone kī zinhār judā

hashr tak hoñge na kuffār se dīn-dār judā

kahīñ tasbīh se hotī nahīñ zunnār judā

farq zāhir hai jo kuchh tā.ir-o-insān meñ hai

ho na phir kabk se kyoñ yaar kī raftār judā

kis liye shaiḳh ko hai tarah-e-pur-pech pe naaz

sar se miinā ke bhī hotī nahīñ dastār judā

niiñd meñ daulat-e-dīdār huī mujh ko nasīb

ḳhvāb ke hote haiñ kyā dīda-e-bedār judā

koī nisbat nahīñ yūsuf ko mire dilbar se

us kā bāzār judā us ke ḳharīdār judā

faisla kyā ho do amle meñ phañse haiñ aa kar

hai ḳhafā maut judā yaar hai bezār judā

vāsta but se na ham ko na ḳhudā se matlab

maz.hab-e-rind judā millat-e-dīñ-dār judā

qatl ko mere parī-rū mizha-o-abrū kī

barchhī rakhte haiñ alag hotī hai talvār judā

tafraqa ho jasad-o-rūh meñ parvāh nahīñ

ho na āshiq se ye ma.ashūq-e-tarahdār judā

in hasīnoñ pe mare ḳhalq na kyūñkar 'tālib'

sehr-e-guftār judā aur tarahdār judā

main na hunga kabhi tujh se but-e-ayyar juda

aag patthar se nahin hone ki zinhaar juda

hashr tak honge na kuffar se din-dar juda

kahin tasbih se hoti nahin zunnar juda

farq zahir hai jo kuchh tair-o-insan mein hai

ho na phir kabk se kyon yar ki raftar juda

kis liye shaiKH ko hai tarah-e-pur-pech pe naz

sar se mina ke bhi hoti nahin dastar juda

nind mein daulat-e-didar hui mujh ko nasib

KHwab ke hote hain kya dida-e-bedar juda

koi nisbat nahin yusuf ko mere dilbar se

us ka bazar juda us ke KHaridar juda

faisla kya ho do amle mein phanse hain aa kar

hai KHafa maut juda yar hai bezar juda

wasta but se na hum ko na KHuda se matlab

mazhab-e-rind juda millat-e-din-dar juda

qatl ko mere pari-ru mizha-o-abru ki

barchhi rakhte hain alag hoti hai talwar juda

tafraqa ho jasad-o-ruh mein parwah nahin

ho na aashiq se ye mashuq-e-tarahdar juda

in hasinon pe mare KHalq na kyunkar 'talib'

sehr-e-guftar juda aur tarahdar juda