main na wo hun ki tanik ghusse mein Tal jaunga

maiñ na vo huuñ ki tanik ġhusse meñ Tal jā.ūñgā

hañs ke tum baat karoge maiñ bahal jā.ūñgā

ham-nashīñ kījiyo taqrīb to shab-bāshī kī

aaj kar nashsha kā hiila maiñ machal jā.ūñgā

dil mire zo.af pe kyā rahm tū khātā hai ki maiñ

jaan se ab kī bachā huuñ to sambhal jā.ūñgā

sair us kūche kī kartā huuñ ki jibrīl jahāñ

jā ke bolā ki bas ab aage maiñ jal jā.ūñgā

tañg huuñ maiñ bhī ab is jiine se ai jī na rukā

jā nikal jā jo tū kahtā hai nikal jā.ūñgā

shor-e-mahshar se hai parvā mujhe kyā ai vaa.iz

jab ki ham-rāh liye dil sā ḳhalal jā.ūñgā

shoḳhī se pahuñchiye juuñ hind meñ tuutī 'qā.em'

aage 'saudā' ke maiñ le kar ye ġhazal jā.ūñgā

main na wo hun ki tanik ghusse mein Tal jaunga

hans ke tum baat karoge main bahal jaunga

ham-nashin kijiyo taqrib to shab-bashi ki

aaj kar nashsha ka hila main machal jaunga

dil mere zoaf pe kya rahm tu khata hai ki main

jaan se ab ki bacha hun to sambhal jaunga

sair us kuche ki karta hun ki jibril jahan

ja ke bola ki bas ab aage main jal jaunga

tang hun main bhi ab is jine se ai ji na ruka

ja nikal ja jo tu kahta hai nikal jaunga

shor-e-mahshar se hai parwa mujhe kya ai waiz

jab ki ham-rah liye dil sa KHalal jaunga

shoKHi se pahunchiye jun hind mein tuti 'qaem'

aage 'sauda' ke main le kar ye ghazal jaunga