main nahin tha ratjagon mein kaun tha mere siwa

maiñ nahīñ thā ratjagoñ meñ kaun thā mere sivā

saath mere vahshatoñ meñ kaun thā mere sivā

ik zamāne meñ huā kartā hai gautam ek hī

dūsrā phir jañgaloñ meñ kaun thā mere sivā

haat vo kis ke the jo mere gale tak aa ga.e

mere jaisā dostoñ meñ kaun thā mere sivā

tum to ḳhud apnī tajallī hī meñ the kho.e hue

aks-dar-aks ā.inoñ meñ kaun thā mere sivā

kis ne mere naam par apnī siyāhī pher dī

mujh se pahle madrasoñ meñ kaun thā mere sivā

kaun uksātā rahā thā sher-goī par mujhe

maujzan merī ragoñ meñ kaun thā mere sivā

paas aate mausamoñ meñ kaun thā mahv-e-ḳhirām

duur hotī āhaToñ meñ kaun thā mere sivā

maiñ to lab-basta thā phir vo chīḳh kaisī thī 'munīr'

raat merī Thokaroñ meñ kaun thā mere sivā

main nahin tha ratjagon mein kaun tha mere siwa

sath mere wahshaton mein kaun tha mere siwa

ek zamane mein hua karta hai gautam ek hi

dusra phir jangalon mein kaun tha mere siwa

hat wo kis ke the jo mere gale tak aa gae

mere jaisa doston mein kaun tha mere siwa

tum to KHud apni tajalli hi mein the khoe hue

aks-dar-aks aainon mein kaun tha mere siwa

kis ne mere nam par apni siyahi pher di

mujh se pahle madrason mein kaun tha mere siwa

kaun uksata raha tha sher-goi par mujhe

maujzan meri ragon mein kaun tha mere siwa

pas aate mausamon mein kaun tha mahw-e-KHiram

dur hoti aahaTon mein kaun tha mere siwa

main to lab-basta tha phir wo chiKH kaisi thi 'munir'

raat meri Thokaron mein kaun tha mere siwa