main naqsh-e-ma-o-man hota ki naqsh-e-ma-siwa hota

maiñ naqsh-e-mā-o-man hotā ki naqsh-e-mā-sivā hotā

jo pahle se ḳhabar hotī ki kyā hotā to kyā hotā

mirī hastī kā nuqta gar na naqsh-e-mā-sivā hotā

azal kī ibtidā hotā abad kī intihā hotā

samajh le rāh-e-ulfat meñ kuchh aisī hī paḌī varna

na dil mujh se judā hotā na maiñ dil se judā hotā

banī jo kuchh banī ham par magar phir bhī ye hasrat hai

ki pahlū dil meñ hotā aur dil meñ mudda.ā hotā

ye aalam thā kabhī dil kā mire josh-e-taḳhayyul se

jo naqsha aañkh meñ phirtā vahī merā ḳhudā hotā

fazā ke zarre zarre meñ tamavvuj hai talātum hai

asar dard-āfrīñ dil kī sadā meñ aur kyā hotā

ḳhayāl-e-hastī-e-mauhūm aafat hai qayāmat hai

ki hone par burā Thahrā na hotā to burā hotā

na aglī sī ḳhalish hai ab na vo pichhlī sī kāvish hai

ulūhī qalb meñ ḳhār-e-tamannā rah gayā hotā

ye manzar majma.a-e-mahshar kā aur mahrūm hai 'beḳhud'

ḳhudāyā parda-e-josh-e-tamannā uTh gayā hotā

main naqsh-e-ma-o-man hota ki naqsh-e-ma-siwa hota

jo pahle se KHabar hoti ki kya hota to kya hota

meri hasti ka nuqta gar na naqsh-e-ma-siwa hota

azal ki ibtida hota abad ki intiha hota

samajh le rah-e-ulfat mein kuchh aisi hi paDi warna

na dil mujh se juda hota na main dil se juda hota

bani jo kuchh bani hum par magar phir bhi ye hasrat hai

ki pahlu dil mein hota aur dil mein muddaa hota

ye aalam tha kabhi dil ka mere josh-e-taKHayyul se

jo naqsha aankh mein phirta wahi mera KHuda hota

faza ke zarre zarre mein tamawwuj hai talatum hai

asar dard-afrin dil ki sada mein aur kya hota

KHayal-e-hasti-e-mauhum aafat hai qayamat hai

ki hone par bura Thahra na hota to bura hota

na agli si KHalish hai ab na wo pichhli si kawish hai

uluhi qalb mein KHar-e-tamanna rah gaya hota

ye manzar majma-e-mahshar ka aur mahrum hai 'beKHud'

KHudaya parda-e-josh-e-tamanna uTh gaya hota