maine chahat ke git gae the

maiñ ne chāhat ke giit gaa.e the

sunñe vaale magar parā.e the

umr bhar ko ḳhushī kā rog lagā

ek do din ko muskurā.e the

rāhateñ hī na kar sake hāsil

rāhatoñ ke mahal banā.e the

mere ḳhvāboñ kī raushnī meñ kabhī

in laboñ par laboñ ke saa.e the

kis ne khīñcheñ jafā kī talvāreñ

kis ne armāñ ke ḳhuuñ bahā.e the

bah rahī haiñ nashāt kī nadiyāñ

kyā ishāre the kyā kinā.e the

maiñ ne chāhat ke āsmāñ par dost

chāñd tāroñ ke daf bajā.e the

haa.e vo din jo tere saath ga.e

naġhma-o-nūr meñ nahā.e the

main ne chahat ke git gae the

sunne wale magar parae the

umr bhar ko KHushi ka rog laga

ek do din ko muskurae the

rahaten hi na kar sake hasil

rahaton ke mahal banae the

mere KHwabon ki raushni mein kabhi

in labon par labon ke sae the

kis ne khinchen jafa ki talwaren

kis ne arman ke KHun bahae the

bah rahi hain nashat ki nadiyan

kya ishaare the kya kinae the

main ne chahat ke aasman par dost

chand taron ke daf bajae the

hae wo din jo tere sath gae

naghma-o-nur mein nahae the