maine is taur se aankhon mein basae ruKHsar

maiñ ne is taur se āñkhoñ meñ basā.e ruḳhsār

maiñ ne jis samt nazar kī nazar aa.e ruḳhsār

rū-ba-rū ho ke musavvir ne mirī āñkhoñ meñ

ik nazar dekh ke kāġhaz pe banā.e ruḳhsār

qalb-e-muztar ko milā chain bharī mahfil meñ

us ne chilman ko haTā kar jo dikhā.e ruḳhsār

lafz ghabrāte hue kilk se bāhar nikle

haa.e tahrīr kī jis vaqt sanā-e-ruḳhsār

gesū-e-yār ne is vāste pahrā rakkhā

koī anjān bashar dekh na paa.e ruḳhsār

jab kabhī ashkoñ kī bārish meñ nahā.e ruḳhsār

lab se niklā mire be-sāḳhta haa.e ruḳhsār

apne ruḳhsār talak lab nahīñ jaate mere

jī meñ aatā hai ki chūmūñ maiñ parā.e ruḳhsār

ek lamhe ke liye zulfeñ haTī thiiñ 'mehvar'

chashm-e-bātin meñ huī qaid adā-e-ruḳhsār

main ne is taur se aankhon mein basae ruKHsar

main ne jis samt nazar ki nazar aae ruKHsar

ru-ba-ru ho ke musawwir ne meri aankhon mein

ek nazar dekh ke kaghaz pe banae ruKHsar

qalb-e-muztar ko mila chain bhari mahfil mein

us ne chilman ko haTa kar jo dikhae ruKHsar

lafz ghabraate hue kilk se bahar nikle

hae tahrir ki jis waqt sana-e-ruKHsar

gesu-e-yar ne is waste pahra rakkha

koi anjaan bashar dekh na pae ruKHsar

jab kabhi ashkon ki barish mein nahae ruKHsar

lab se nikla mere be-saKHta hae ruKHsar

apne ruKHsar talak lab nahin jate mere

ji mein aata hai ki chumun main parae ruKHsar

ek lamhe ke liye zulfen haTi thin 'mehwar'

chashm-e-baatin mein hui qaid ada-e-ruKHsar