maine jab us se kaha dekh zara pani mein

maiñ ne jab us se kahā dekh zarā paanī meñ

ik gul-e-tāza kañval khilne lagā paanī meñ

kāġhazī kashtī pe ik ḳhvāb rakhā ek diyā

aur ik ism paḌhā chhoḌ diyā paanī meñ

ek darvesh sar-e-āb-e-ravāñ guzrā thā

aaj tak DhūñD rahā huuñ kaf-e-pā paanī meñ

pahle maiñ chaltā rahā der talak chaltā rahā

phir mirā ashk girā phir maiñ girā paanī meñ

sar paTaḳhte hue dariyā ko jo dekhā to lagā

koī aaseb hai yā koī balā paanī meñ

ek sailāb umaD aaya tirī yādoñ kā

aur maiñ der talak bahtā rahā paanī meñ

aise raushan hai mirī aañkh meñ ik ḳhvāb-e-hasīñ

jhilmilātā ho koī jaise diyā paanī meñ

maiñ tazādāt ke gaare se banā huuñ 'ahmad'

ḳhaak meñ rakkhā gayā aag huā paanī meñ

main ne jab us se kaha dekh zara pani mein

ek gul-e-taza kanwal khilne laga pani mein

kaghazi kashti pe ek KHwab rakha ek diya

aur ek ism paDha chhoD diya pani mein

ek darwesh sar-e-ab-e-rawan guzra tha

aaj tak DhunD raha hun kaf-e-pa pani mein

pahle main chalta raha der talak chalta raha

phir mera ashk gira phir main gira pani mein

sar paTaKHte hue dariya ko jo dekha to laga

koi aaseb hai ya koi bala pani mein

ek sailab umaD aaya teri yaadon ka

aur main der talak bahta raha pani mein

aise raushan hai meri aankh mein ek KHwab-e-hasin

jhilmilata ho koi jaise diya pani mein

main tazadat ke gare se bana hun 'ahmad'

KHak mein rakkha gaya aag hua pani mein