maine kab chaha muradon ka safar aisa na ho

maiñ ne kab chāhā murādoñ kā safar aisā na ho

bas mire ehsās ko jiine se Dar aisā na ho

noch Dālūñ maiñ sab apne bāl-o-par aisā na ho

zaḳhm-e-dil aise na hoñ saudā-e-sar aisā na ho

kyā kahūñ maiñ ne to logoñ ko ye kahte bhī sunā

is tarah kā ho ġham-e-dīvār-o-dar aisā na ho

ġhāliban ham sab kī taqdīreñ haiñ bāham munsalik

lekin us sūrat meñ kyā hogā agar aisā na ho

mausamoñ ke saath badlūñ yā na badlūñ kyā karūñ

baat phir aa jaa.e mere zarf par aisā na ho

tajrabe kī raushnī meñ dosto kahtā huuñ maiñ

zindagī se bhī koī nazdīk-tar aisā na ho

main ne kab chaha muradon ka safar aisa na ho

bas mere ehsas ko jine se Dar aisa na ho

noch Dalun main sab apne baal-o-par aisa na ho

zaKHm-e-dil aise na hon sauda-e-sar aisa na ho

kya kahun main ne to logon ko ye kahte bhi suna

is tarah ka ho gham-e-diwar-o-dar aisa na ho

ghaaliban hum sab ki taqdiren hain baham munsalik

lekin us surat mein kya hoga agar aisa na ho

mausamon ke sath badlun ya na badlun kya karun

baat phir aa jae mere zarf par aisa na ho

tajrabe ki raushni mein dosto kahta hun main

zindagi se bhi koi nazdik-tar aisa na ho