میں نے کب رکھنا تھا اس بت کو خدا سے پہلے

میں نے کب رکھنا تھا اس بت کو خدا سے پہلے

کاش مجھ پر یہ کھلا ہوتا قضا سے پہلے

کتنی پاتال سراؤں میں بھٹکتا رہا ہوں

راحت جاں تری آرام سرا سے پہلے

ہم وہ خوشبو ہیں جو یکتائی کی خو رکھتے ہیں

رابطے توڑ کے آ باد صبا سے پہلے

دل ترے کفر پہ حیران نہیں ہے مرے دوست

لا کی منزل بھی ہے اقرار وفا سے پہلے

اب ضروری ہے سو ہے درد برتنے کا ہنر

چپ کے ارکان ادا کیجے صدا سے پہلے

تو ضرورت ہر اک ایجاد کی ماں ہے یعنی

زخم ایجاد کیا اس نے دوا سے پہلے