maine kuchh ashaar junhi aaine par dam kiye

maiñ ne kuchh ash.ār jūñhī aa.ine par dam kiye

aks terā lā dikhāyā us ne sar ko ḳham kiye

kī samā.at kī tavāzo.a is madhur āvāz se

rizq-e-bīnā.ī usī paikar ke zer-o-bam kiye

muhr hoñToñ se lagā.ī is zamīn-e-husn par

apne qabze is zamīñ par aur mustahkam kiye

jaan Daalī tazkira-e-yār se alfāz meñ

sīdhe-sāde sher us ke zikr se mub.ham kiye

raat guzrī maḳhmalī hāthoñ ke takiye par mirī

shukr hai maulā mayassar tū ne ye resham kiye

sub.h-e-vasl us kī chahak se guuñj uTThe bām-o-dar

boltī thī pahle jo āvāz ko maddham kiye

bah rahā thā lams kā dariyā guzashta shab 'qamar'

ḳhuub ham ne bhī masām-e-jism us se nam kiye

main ne kuchh ashaar junhi aaine par dam kiye

aks tera la dikhaya us ne sar ko KHam kiye

ki samaat ki tawazoa is madhur aawaz se

rizq-e-binai usi paikar ke zer-o-bam kiye

muhr honTon se lagai is zamin-e-husn par

apne qabze is zamin par aur mustahkam kiye

jaan Dali tazkira-e-yar se alfaz mein

sidhe-sade sher us ke zikr se mubham kiye

raat guzri maKHmali hathon ke takiye par meri

shukr hai maula mayassar tu ne ye resham kiye

subh-e-wasl us ki chahak se gunj uTThe baam-o-dar

bolti thi pahle jo aawaz ko maddham kiye

bah raha tha lams ka dariya guzashta shab 'qamar'

KHub hum ne bhi masam-e-jism us se nam kiye