میں نے پوچھا خوشی ملی کہ نہیں

میں نے پوچھا خوشی ملی کہ نہیں

چیخ کر بولی زندگی کہ نہیں

در پہ اک آرزو رکھ آیا تھا

وہ ابھی تک تمہیں ملی کہ نہیں

آئنہ تو جھٹک دیا تم نے

اس کی جھنکار بھی سنی کہ نہیں

کب سے رکھا ہوں میں دکاں پہ تیری

کوئی قیمت مری لگی کہ نہیں

اتنا نشہ تمہاری آنکھوں میں

سچ بتانا کبھی چھوئی کہ نہیں

کتنے جھوٹوں میں سچ کو رکھا ہے

بات پھر بھی کوئی بنی کہ نہیں

مدتوں سے مرا پڑا ہوں میں

نبض دیکھو ابھی تھمی کہ نہیں