maine puchha pahla patthar mujh par kaun uThaega

maiñ ne pūchhā pahlā patthar mujh par kaun uThā.egā

aa.ī ik āvāz ki tū jis kā mohsin kahlā.egā

pūchh sake to pūchhe koī ruuTh ke jaane vāloñ se

raushniyoñ ko mere ghar kā rasta kaun batā.egā

Daalī hai is ḳhush-fahmī ne aadat mujh ko sone kī

niklegā jab sūraj to ḳhud mujh ko aan jagā.egā

logo mere saath chalo tum jo kuchh hai vo aage hai

pīchhe muḌ kar dekhne vaalā patthar kā ho jā.egā

din meñ hañs kar milne vaale chehre saaf batāte haiñ

ek bhayānak sapnā mujh ko saarī raat Darā.egā

mere ba.ad vafā kā dhokā aur kisī se mat karnā

gaalī degī duniyā tujh ko sar merā jhuk jā.egā

suukh ga.ī jab āñkhoñ meñ pyaar kī niilī jhiil 'qatīl'

tere dard kā zard samundar kaahe shor machā.egā

main ne puchha pahla patthar mujh par kaun uThaega

aai ek aawaz ki tu jis ka mohsin kahlaega

puchh sake to puchhe koi ruTh ke jaane walon se

raushniyon ko mere ghar ka rasta kaun bataega

Dali hai is KHush-fahmi ne aadat mujh ko sone ki

niklega jab suraj to KHud mujh ko aan jagaega

logo mere sath chalo tum jo kuchh hai wo aage hai

pichhe muD kar dekhne wala patthar ka ho jaega

din mein hans kar milne wale chehre saf batate hain

ek bhayanak sapna mujh ko sari raat Daraega

mere baad wafa ka dhoka aur kisi se mat karna

gali degi duniya tujh ko sar mera jhuk jaega

sukh gai jab aankhon mein pyar ki nili jhil 'qatil'

tere dard ka zard samundar kahe shor machaega