maine to sirf manga hai utna duaon mein

maiñ ne to sirf māñgā hai utnā duāoñ meñ

zanjīr hī paḌī rahe lālach ke paañv meñ

ḳhākī butoñ meñ qaid na kar apne ishq ko

uḌne de is parinde ko chāroñ dishāoñ meñ

vo pur-asar sadā hai jo āvāz-e-ḳhalq hai

varna to sirf shor bharā hai sadāoñ meñ

duniyā simaT rahī hai ki tafrīh ke liye

ā.inda log jaayā kareñge ḳhalāoñ meñ

terī talāsh le ke ga.ī hai kahāñ kahāñ

patthar ke shahr meñ kabhī ulfat ke gaañv meñ

hotī rahī hayāt lagātār muntaqil

zaḳhmoñ kī dhuup meñ kabhī zulfoñ kī chhāñv meñ

insāniyat kī saañs ukhaḌ ne lagī hai ab

nafrat kā zahr gholā gayā hai havāoñ meñ

mumkin kī had se duur na le jaa.e āsthā

zanjīr Daale rakhnā sadā is ke paañv meñ

bas is liye ki chūlhe se uThtā rahe dhuāñ

mazdūr jal rahā hai thakan kī chitāoñ meñ

kaise banā.eñ jhuuT ko ham aur pur-kashish

charchā ye ho rahā hai siyāsī sabhāoñ meñ

main ne to sirf manga hai utna duaon mein

zanjir hi paDi rahe lalach ke panw mein

KHaki buton mein qaid na kar apne ishq ko

uDne de is parinde ko chaaron dishaon mein

wo pur-asar sada hai jo aawaz-e-KHalq hai

warna to sirf shor bhara hai sadaon mein

duniya simaT rahi hai ki tafrih ke liye

aainda log jaya karenge KHalaon mein

teri talash le ke gai hai kahan kahan

patthar ke shahr mein kabhi ulfat ke ganw mein

hoti rahi hayat lagatar muntaqil

zaKHmon ki dhup mein kabhi zulfon ki chhanw mein

insaniyat ki sans ukhaD ne lagi hai ab

nafrat ka zahr ghola gaya hai hawaon mein

mumkin ki had se dur na le jae aastha

zanjir Dale rakhna sada is ke panw mein

bas is liye ki chulhe se uThta rahe dhuan

mazdur jal raha hai thakan ki chitaon mein

kaise banaen jhuT ko hum aur pur-kashish

charcha ye ho raha hai siyasi sabhaon mein