میں نے تو صرف مانگا ہے اتنا دعاؤں میں

میں نے تو صرف مانگا ہے اتنا دعاؤں میں

زنجیر ہی پڑی رہے لالچ کے پاؤں میں

خاکی بتوں میں قید نہ کر اپنے عشق کو

اڑنے دے اس پرندے کو چاروں دشاؤں میں

وہ پر اثر صدا ہے جو آواز خلق ہے

ورنہ تو صرف شور بھرا ہے صداؤں میں

دنیا سمٹ رہی ہے کہ تفریح کے لئے

آئندہ لوگ جایا کریں گے خلاؤں میں

تیری تلاش لے کے گئی ہے کہاں کہاں

پتھر کے شہر میں کبھی الفت کے گاؤں میں

ہوتی رہی حیات لگاتار منتقل

زخموں کی دھوپ میں کبھی زلفوں کی چھاؤں میں

انسانیت کی سانس اکھڑ نے لگی ہے اب

نفرت کا زہر گھولا گیا ہے ہواؤں میں

ممکن کی حد سے دور نہ لے جائے آستھا

زنجیر ڈالے رکھنا سدا اس کے پاؤں میں

بس اس لیے کہ چولھے سے اٹھتا رہے دھواں

مزدور جل رہا ہے تھکن کی چتاؤں میں

کیسے بنائیں جھوٹ کو ہم اور پر کشش

چرچا یہ ہو رہا ہے سیاسی سبھاؤں میں