maine un se jo kaha dhyan mera kuchh bhi nahin

maiñ ne un se jo kahā dhyān mirā kuchh bhī nahīñ

haa.e kis naaz se hañs hañs ke kahā kuchh bhī nahīñ

arz kī kuchh dil-e-āshiq kī ḳhabar hai to kahā

haañ nahīñ kuchh nahīñ bas kah to diyā kuchh bhī nahīñ

tū na aayā shab-e-va.ada to gayā kyā terā

mar miTe ham tire nazdīk huā kuchh bhī nahīñ

kyā hai anjām-e-mohabbat koī pūchhe ham se

jīte-jī ḳhaak meñ milne ke sivā kuchh bhī nahīñ

kis kī mehr aur vafā ab hai jafā se bhī gurez

kyuuñ na jal kar kaheñ ulfat meñ mazā kuchh bhī nahīñ

āñkhoñ hī āñkhoñ meñ dil le gayā siine se nikāl

haath se ham ne diyā us ne liyā kuchh bhī nahīñ

mire allāh ye patthar ki butoñ kā dil hai

rahm rusvā.ī kā Dar ḳhauf-e-ḳhudā kuchh bhī nahīñ

kaun sā dard hai jis kā nahīñ duniyā meñ ilaaj

lekin is dard-e-mohabbat kī davā kuchh bhī nahīñ

dekhā 'kaifī' ko to be-sāḳhta yuuñ bol uThe

ab to bīmār-e-mohabbat meñ rahā kuchh bhī nahīñ

main ne un se jo kaha dhyan mera kuchh bhi nahin

hae kis naz se hans hans ke kaha kuchh bhi nahin

arz ki kuchh dil-e-ashiq ki KHabar hai to kaha

han nahin kuchh nahin bas kah to diya kuchh bhi nahin

tu na aaya shab-e-wada to gaya kya tera

mar miTe hum tere nazdik hua kuchh bhi nahin

kya hai anjam-e-mohabbat koi puchhe hum se

jite-ji KHak mein milne ke siwa kuchh bhi nahin

kis ki mehr aur wafa ab hai jafa se bhi gurez

kyun na jal kar kahen ulfat mein maza kuchh bhi nahin

aankhon hi aankhon mein dil le gaya sine se nikal

hath se hum ne diya us ne liya kuchh bhi nahin

mere allah ye patthar ki buton ka dil hai

rahm ruswai ka Dar KHauf-e-KHuda kuchh bhi nahin

kaun sa dard hai jis ka nahin duniya mein ilaj

lekin is dard-e-mohabbat ki dawa kuchh bhi nahin

dekha 'kaifi' ko to be-saKHta yun bol uThe

ab to bimar-e-mohabbat mein raha kuchh bhi nahin