main pa-shikasta kahan tifl-e-nai sawar kahan

maiñ pā-shikasta kahāñ tifl-e-nai savār kahāñ

phir us kī gard kahāñ aur mirā ġhubār kahāñ

tumhāre vasl se Thahregā ye dil-e-be-tāb

baġhair aa.ina sīmāb ko qarār kahāñ

bahut dinoñ se huuñ aamad kā apnī chashm-e-ba-rāh

tumhārā le gayā ai yaar intizār kahāñ

jo sard-mehrī se ThanDā ho us ke ai mah-rū

ragoñ meñ ḳhuun kahāñ nabz meñ buḳhār kahāñ

nikal ke siine se jā pahuñche tūr-e-sīnā par

ga.ī chamakne mirī āh-e-pur-sharār kahāñ

jo samjheñ tere dam-e-teġh ko tarīq apnā

batā de dahr meñ haiñ aise sar-guzār kahāñ

falak kī sulh ko samjhe raho 'vaqār' jidāl

bane bhī dost jo dushman to e'tibār kahāñ

main pa-shikasta kahan tifl-e-nai sawar kahan

phir us ki gard kahan aur mera ghubar kahan

tumhaare wasl se Thahrega ye dil-e-be-tab

baghair aaina simab ko qarar kahan

bahut dinon se hun aamad ka apni chashm-e-ba-rah

tumhaara le gaya ai yar intizar kahan

jo sard-mehri se ThanDa ho us ke ai mah-ru

ragon mein KHun kahan nabz mein buKHar kahan

nikal ke sine se ja pahunche tur-e-sina par

gai chamakne meri aah-e-pur-sharar kahan

jo samjhen tere dam-e-tegh ko tariq apna

bata de dahr mein hain aise sar-guzar kahan

falak ki sulh ko samjhe raho 'waqar' jidal

bane bhi dost jo dushman to e'tibar kahan