main pahron ghar mein paDa dil se baat karta hun

maiñ pahroñ ghar meñ paḌā dil se baat kartā huuñ

jab us ke shakl-o-shamā.il se baat kartā huuñ

ba-vaqt-e-zab.h bhī hilte raheñ haiñ lab mere

zi-bas-ki ḳhanjar-e-qātil se baat kartā huuñ

mirī zabāñ ko mirā ham-navā hī samjhe hai

maiñ niim zab.h huuñ bismil se baat kartā huuñ

na naaqa aur na mahmil rahā maiñ saudā.ī

hanūz naaqa o mahmil se baat kartā huuñ

hai in dinoñ mirī āvāz meñ yahāñ tak zo.af

ki apne saath bhī mushkil se baat kartā huuñ

samajh na mauj mire muñh meñ haiñ hazāroñ zabāñ

maiñ bahr huuñ lab-e-sāhil se baat kartā huuñ

maza mile hai mujhe us kī ham-kalāmī kā

maiñ us ke dar ke jo saa.il se baat kartā huuñ

ba-vaqt-e-ā.īna dīdan bulā.ūñ maiñ to kahe

maiñ apne āshiq-e-mā.il se baat kartā huuñ

jo 'mus.hafī' kī sifārish kareñ to bole vo shoḳh

maiñ aise nañg-e-qabā.il se baat kartā huuñ

main pahron ghar mein paDa dil se baat karta hun

jab us ke shakl-o-shamail se baat karta hun

ba-waqt-e-zabh bhi hilte rahen hain lab mere

zi-bas-ki KHanjar-e-qatil se baat karta hun

meri zaban ko mera ham-nawa hi samjhe hai

main nim zabh hun bismil se baat karta hun

na naqa aur na mahmil raha main saudai

hanuz naqa o mahmil se baat karta hun

hai in dinon meri aawaz mein yahan tak zoaf

ki apne sath bhi mushkil se baat karta hun

samajh na mauj mere munh mein hain hazaron zaban

main bahr hun lab-e-sahil se baat karta hun

maza mile hai mujhe us ki ham-kalami ka

main us ke dar ke jo sail se baat karta hun

ba-waqt-e-aina didan bulaun main to kahe

main apne aashiq-e-mail se baat karta hun

jo 'mushafi' ki sifarish karen to bole wo shoKH

main aise nang-e-qabail se baat karta hun