main parbat hun wo rai ki tarah hai

maiñ parbat huuñ vo raa.ī kī tarah hai

hamāre biich khaa.ī kī tarah hai

Thanī jis se laḌā.ī kī tarah hai

vo bilkul mere bhaa.ī kī tarah hai

sulūk ehsās kā jaañ se hamārī

kisī kī bevafā.ī kī tarah hai

nahīñ kul apnī ye fasl-e-tamannā

zamīn-e-dil baTā.ī kī tarah hai

amīr-e-shahr kī ūñchī 'imārat

mirī TuuTī chatā.ī kī tarah hai

ta'āruf chehra-e-zohra-jabīñ kā

kutub kī rū-numā.ī kī tarah hai

pas-e-dād-e-suḳhan ai 'badr'-e-pinhāñ

koī shai ham-navā.ī kī tarah hai

main parbat hun wo rai ki tarah hai

hamare bich khai ki tarah hai

Thani jis se laDai ki tarah hai

wo bilkul mere bhai ki tarah hai

suluk ehsas ka jaan se hamari

kisi ki bewafai ki tarah hai

nahin kul apni ye fasl-e-tamanna

zamin-e-dil baTai ki tarah hai

amir-e-shahr ki unchi 'imarat

meri TuTi chatai ki tarah hai

ta'aruf chehra-e-zohra-jabin ka

kutub ki ru-numai ki tarah hai

pas-e-dad-e-suKHan ai 'badr'-e-pinhan

koi shai ham-nawai ki tarah hai