main por por talak ishq mein nikharne laga

maiñ por por talak ishq meñ nikharne lagā

tirā visāl mohabbat meñ rang bharne lagā

tabhī se mere buzurgoñ ko fikr hone lagī

maiñ ek din meñ ka.ī baar jab sañvarne lagā

mazā ḳhulūs meñ hotā hai guftugū meñ nahīñ

jise samajh nahīñ aa.ī vo baat karne lagā

vo jitnī der se Duubā mirī mohabbat meñ

maiñ utnā jald hī ash.ār meñ ubharne lagā

hamārā saath nibhā.e vo kaise mumkin hai

jo apne ḳhuun ke rishtoñ se bhī mukarne lagā

har ek lafz kī āñkhoñ se ashk bahne lage

sune ko an-sunā kar ke koī guzarne lagā

havā-e-hijr ne har naqsh jab miTā Daalā

to ek din tirā 'shahbāz' bhī bikharne lagā

main por por talak ishq mein nikharne laga

tera visal mohabbat mein rang bharne laga

tabhi se mere buzurgon ko fikr hone lagi

main ek din mein kai bar jab sanwarne laga

maza KHulus mein hota hai guftugu mein nahin

jise samajh nahin aai wo baat karne laga

wo jitni der se Duba meri mohabbat mein

main utna jald hi ashaar mein ubharne laga

hamara sath nibhae wo kaise mumkin hai

jo apne KHun ke rishton se bhi mukarne laga

har ek lafz ki aankhon se ashk bahne lage

sune ko an-suna kar ke koi guzarne laga

hawa-e-hijr ne har naqsh jab miTa Dala

to ek din tera 'shahbaz' bhi bikharne laga