main raaz-e-gham-e-ishq se begana nahin hun

maiñ rāz-e-ġham-e-ishq se begāna nahīñ huuñ

dīvāna mujhe kahte haiñ dīvāna nahīñ huuñ

aisā huuñ piyāla jo mohabbat se hai labrez

bhar kar jo chhalak jaa.e vo paimāna nahīñ huuñ

vo soz-e-mohabbat huuñ jo pinhāñ rahe dil meñ

aa jaa.e jo lab par maiñ vo afsāna nahīñ huuñ

maiñ ārzū-e-dīd meñ ghultā huuñ shab-o-roz

jo sham.a pe jal jaa.e vo parvāna nahīñ huuñ

ab jāda-e-ulfat meñ junūñ rāh-numā hai

gum-gashta-e-manzil ho vo farzāna nahīñ huuñ

pur-kaif mai-e-ishq se paimāna-e-dil hai

sad-shukr ki ab tishna-e-ḳhum-ḳhāna nahīñ huuñ

dāġh-e-dil-e-majrūh hai ham-rang-e-gulistāñ

jalvoñ kā ḳhazāna huuñ maiñ vīrāna nahīñ huuñ

ḳhud qalb mirā jalva-gah-e-husn-e-azal hai

ai 'zabt' maiñ joyā-e-sanam-ḳhāna nahīñ huuñ

main raaz-e-gham-e-ishq se begana nahin hun

diwana mujhe kahte hain diwana nahin hun

aisa hun piyala jo mohabbat se hai labrez

bhar kar jo chhalak jae wo paimana nahin hun

wo soz-e-mohabbat hun jo pinhan rahe dil mein

aa jae jo lab par main wo afsana nahin hun

main aarzu-e-did mein ghulta hun shab-o-roz

jo shama pe jal jae wo parwana nahin hun

ab jada-e-ulfat mein junun rah-numa hai

gum-gashta-e-manzil ho wo farzana nahin hun

pur-kaif mai-e-ishq se paimana-e-dil hai

sad-shukr ki ab tishna-e-KHum-KHana nahin hun

dagh-e-dil-e-majruh hai ham-rang-e-gulistan

jalwon ka KHazana hun main virana nahin hun

KHud qalb mera jalwa-gah-e-husn-e-azal hai

ai 'zabt' main joya-e-sanam-KHana nahin hun