میں راز غم عشق سے بیگانہ نہیں ہوں

میں راز غم عشق سے بیگانہ نہیں ہوں

دیوانہ مجھے کہتے ہیں دیوانہ نہیں ہوں

ایسا ہوں پیالہ جو محبت سے ہے لبریز

بھر کر جو چھلک جائے وہ پیمانہ نہیں ہوں

وہ سوز محبت ہوں جو پنہاں رہے دل میں

آ جائے جو لب پر میں وہ افسانہ نہیں ہوں

میں آرزوئے دید میں گھلتا ہوں شب و روز

جو شمع پہ جل جائے وہ پروانہ نہیں ہوں

اب جادۂ الفت میں جنوں راہنما ہے

گم گشتہ منزل ہو وہ فرزانہ نہیں ہوں

پر کیف مئے عشق سے پیمانۂ دل ہے

صد شکر کہ اب تشنۂ خم خانہ نہیں ہوں

داغ دل مجروح ہے ہم رنگ گلستاں

جلووں کا خزانہ ہوں میں ویرانہ نہیں ہوں

خود قلب مرا جلوہ گہ حسن ازل ہے

اے ضبطؔ میں جویائے صنم خانہ نہیں ہوں