main ruThta tha to mujhko manaya karta tha

maiñ rūThtā thā to mujh ko manāyā kartā thā

kisī kā hijr mire naaz uThāyā kartā thā

bigāḌ detā thā tartīb maiñ sitāroñ kī

vo kahkashāñ ko dubāra sajāyā kartā thā

mirī udāsiyāñ gaatī thiiñ giit sāvan ke

añdherā mujh ko kahānī sunāyā kartā thā

tamām raat barastī thī chāñdnī mujh par

maiñ sar se paañv talak bhiig jaayā kartā thā

ye ashk aañkh se jab bhī nahīñ nikalte the

maiñ un dinoñ bhī faqat muskurāyā kartā thā

maiñ maarā phirtā thā rozāna tez dhūpoñ meñ

magar vo abr kā TukḌā jo saaya kartā thā

na jaane kaise sabhī jaan jaayā karte the

vo ik ḳhayāl jo sab se chhupāyā kartā thā

ye bhiiḌ roz mujhe gum-shuda banātī thī

magar vo roz mujhe DhūñDh laayā kartā thā

maiñ us ko bhuul chukā huuñ kabhī kabhī lekin

ye yaad aatā hai vo yaad aayā kartā thā

main ruThta tha to mujh ko manaya karta tha

kisi ka hijr mere naz uThaya karta tha

bigaD deta tha tartib main sitaron ki

wo kahkashan ko dubara sajaya karta tha

meri udasiyan gati thin git sawan ke

andhera mujh ko kahani sunaya karta tha

tamam raat barasti thi chandni mujh par

main sar se panw talak bhig jaya karta tha

ye ashk aankh se jab bhi nahin nikalte the

main un dinon bhi faqat muskuraya karta tha

main mara phirta tha rozana tez dhupon mein

magar wo abr ka TukDa jo saya karta tha

na jaane kaise sabhi jaan jaya karte the

wo ek KHayal jo sab se chhupaya karta tha

ye bhiD roz mujhe gum-shuda banati thi

magar wo roz mujhe DhunDh laya karta tha

main us ko bhul chuka hun kabhi kabhi lekin

ye yaad aata hai wo yaad aaya karta tha