main samajh raha tha ki waqt ne tera nam dil se miTa diya

maiñ samajh rahā thā ki vaqt ne tirā naam dil se miTā diyā

shab-e-ġham magar tirī yaad ne mujhe aaj phir se rulā diyā

na hai tīrgī se gila koī na hai raushnī kī talab mujhe

mirī hasratoñ ke charāġh ko tirī be-ruḳhī ne bujhā diyā

ye mire hī zarf kī baat thī na kisī se kuchh bhī kahā magar

tirī furqatoñ kā jo dard thā mire āñsuoñ ne batā diyā

mire ham-nashīñ mire ham-navā tujhe nazr kyā karūñ maiñ batā

mirā dil bhī merā nahīñ rahā tire 'ishq meñ hī luTā diyā

na masarratoñ se sukūn kī kabhī chand sāñseñ 'atā huiiñ

ġham-e-zindagī tirā shukriya mujhe tū ne jiinā sikhā diyā

kahūñ us ko achchhā yā maiñ burā nahīñ hotā mujh se ye faisla

kabhī dostī ne vafā kiyā kabhī dostī ne daġhā diyā

main samajh raha tha ki waqt ne tera nam dil se miTa diya

shab-e-gham magar teri yaad ne mujhe aaj phir se rula diya

na hai tirgi se gila koi na hai raushni ki talab mujhe

meri hasraton ke charagh ko teri be-ruKHi ne bujha diya

ye mere hi zarf ki baat thi na kisi se kuchh bhi kaha magar

teri furqaton ka jo dard tha mere aansuon ne bata diya

mere ham-nashin mere ham-nawa tujhe nazr kya karun main bata

mera dil bhi mera nahin raha tere 'ishq mein hi luTa diya

na masarraton se sukun ki kabhi chand sansen 'ata huin

gham-e-zindagi tera shukriya mujhe tu ne jina sikha diya

kahun us ko achchha ya main bura nahin hota mujh se ye faisla

kabhi dosti ne wafa kiya kabhi dosti ne dagha diya