main samajhta hun tujhe meri wafa yaad nahin

maiñ samajhtā huuñ tujhe merī vafā yaad nahīñ

tū samajhtā hai mujhe terī jafā yaad nahīñ

pūjtā huuñ maiñ butoñ ko ki ḳhudā yaad aa.e

ye sitam hai ki barahman ko ḳhudā yaad nahīñ

gar saḳhī bhuul gayā de ke yahī lāzim thā

lene vaale ko bhī afsos liyā yaad nahīñ

aise bhī log haiñ duniyā se nahīñ kaam jinheñ

un pe jo guzrā bhalā thā ki burā yaad nahīñ

tire dīvāne ko ai yaar faqat tujh se hai kaam

bādshah kaun hai aur kaun gadā yaad nahīñ

terī hī dhun meñ guzartī hai tire pyāroñ kī

is meñ kyā kyā na huī un pe jafā yaad nahīñ

apne maulā se jo kuchh māñgo abhī vo degā

'shād' muztar na ho kyā koī duā yaad nahīñ

main samajhta hun tujhe meri wafa yaad nahin

tu samajhta hai mujhe teri jafa yaad nahin

pujta hun main buton ko ki KHuda yaad aae

ye sitam hai ki barahman ko KHuda yaad nahin

gar saKHi bhul gaya de ke yahi lazim tha

lene wale ko bhi afsos liya yaad nahin

aise bhi log hain duniya se nahin kaam jinhen

un pe jo guzra bhala tha ki bura yaad nahin

tere diwane ko ai yar faqat tujh se hai kaam

baadshah kaun hai aur kaun gada yaad nahin

teri hi dhun mein guzarti hai tere pyaron ki

is mein kya kya na hui un pe jafa yaad nahin

apne maula se jo kuchh mango abhi wo dega

'shad' muztar na ho kya koi dua yaad nahin