main samajhta tha haqiqat aashna ho jaega

maiñ samajhtā thā haqīqat āshnā ho jā.egā

kyā ḳhabar thī merī bātoñ se ḳhafā ho jā.egā

rafta-rafta ibtilā-e-ġham shifā ho jā.egā

dard hī had se guzarne par davā ho jā.egā

ham pe to pahle hī zāhir thā ma.āl-e-bandagī

pūjne jāoge jis but ko ḳhudā ho jā.egā

tajrbe kī aañch se āḳhir raqīb-e-rū-siyah

un kī qurbat se hamārā ham-navā ho jā.egā

aah jo siine se niklegī fuġhāñ ban jā.egī

ashk jo āñkhoñ se Tapkegā du'ā ban jā.egā

dam-ba-dam jo saath dene kā kiyā kartā thā 'ahd

kis ko thā mā'lūm ki ik din judā ho jā.egā

chhoḌne vaale sar-e-rāhe hameñ tere liye

zindagānī kā safar be-mudda.ā ho jā.egā

ik nigāh-e-lutf vo pahlī sī dildārī ke saath

daan kar diije ġharīboñ kā bhalā ho jā.egā

sahl-tar hogā najāt-e-ḳhalq meñ qarz-e-vafā

jaan bhī degā agar 'aḳhtar' adā ho jā.egā

main samajhta tha haqiqat aashna ho jaega

kya KHabar thi meri baaton se KHafa ho jaega

rafta-rafta ibtila-e-gham shifa ho jaega

dard hi had se guzarne par dawa ho jaega

hum pe to pahle hi zahir tha maal-e-bandagi

pujne jaoge jis but ko KHuda ho jaega

tajrbe ki aanch se aaKHir raqib-e-ru-siyah

un ki qurbat se hamara ham-nawa ho jaega

aah jo sine se niklegi fughan ban jaegi

ashk jo aankhon se Tapkega du'a ban jaega

dam-ba-dam jo sath dene ka kiya karta tha 'ahd

kis ko tha ma'lum ki ek din juda ho jaega

chhoDne wale sar-e-rahe hamein tere liye

zindagani ka safar be-muddaa ho jaega

ek nigah-e-lutf wo pahli si dildari ke sath

dan kar dije gharibon ka bhala ho jaega

sahl-tar hoga najat-e-KHalq mein qarz-e-wafa

jaan bhi dega agar 'aKHtar' ada ho jaega