main samjha tha mohabbat phir mohabbat hai maza degi

maiñ samjhā thā mohabbat phir mohabbat hai mazā degī

ye kyā mā'lūm thā zālim shab-e-furqat rulā degī

mujhe bas dekh lo tum maiñ zabāñ se kuchh nahīñ kahtā

mire dil kī jo hālat hai mirī sūrat batā degī

sun ai ġhāfil ye sair-e-bāġh-e-hastī tā-ba-kai āḳhir

qazā ik din tujhe āġhosh-e-turbat meñ sulā degī

ġhalat hai ye vo ā.eñge na aa.e haiñ na ā.eñge

batā ai shām-e-ġham kab mujh ko paiġhām-e-qazā degī

vo ghaḌiyāñ gin rahā hai maut kī ai vaa.e nākāmī

jo kahtā thā mohabbat zindagī merī banā degī

burā ho yā ḳhudā kam-baḳht is barbād qismat kā

jahāñ par āshiyāñ hogā vahīñ bijlī girā degī

sivā.e tere ab koī nahīñ hai tere 'fāzil' kā

ilāhī terī rahmat hī use kuchh aasrā degī

main samjha tha mohabbat phir mohabbat hai maza degi

ye kya ma'lum tha zalim shab-e-furqat rula degi

mujhe bas dekh lo tum main zaban se kuchh nahin kahta

mere dil ki jo haalat hai meri surat bata degi

sun ai ghafil ye sair-e-bagh-e-hasti ta-ba-kai aaKHir

qaza ek din tujhe aaghosh-e-turbat mein sula degi

ghalat hai ye wo aaenge na aae hain na aaenge

bata ai sham-e-gham kab mujh ko paigham-e-qaza degi

wo ghaDiyan gin raha hai maut ki ai wae nakaami

jo kahta tha mohabbat zindagi meri bana degi

bura ho ya KHuda kam-baKHt is barbaad qismat ka

jahan par aashiyan hoga wahin bijli gira degi

siwae tere ab koi nahin hai tere 'fazil' ka

ilahi teri rahmat hi use kuchh aasra degi