میں شاعری کا فقط اشتہار کرتا ہوں

میں شاعری کا فقط اشتہار کرتا ہوں

گلوں سے عشق پرندوں سے پیار کرتا ہوں

مرے بدن پہ تھکن دیکھ کیسے بکھری ہے

کہ جیسے روز سمندر کو پار کرتا ہوں

وہ سادہ دل ہے گزرتی ہو جانے کیا اس پر

میں جس طرح سے اسے بے قرار کرتا ہوں

میں تیری باتوں کو سنتا ہوں جو خموشی سے

تجھے لگا کہ ترا اعتبار کرتا ہوں

میں بیٹھ جاتا ہوں ہر شام گھر کی چوکھٹ پر

پھر اپنے لوٹنے کا انتظار کرتا ہوں

بس اب کی بار تو مر کر بھی دیکھنا ہے مجھے

کوئی بھی کام ہو میں ایک بار کرتا ہوں