main sochta hun kahin tu KHafa na ho jae

maiñ sochtā huuñ kahīñ tū ḳhafā na ho jaa.e

tirī anā mirī zanjīr-e-pā na ho jaa.e

ye jītī-jāgtī āñkheñ ye ḳhvāb sī duniyā

vufūr-e-shauq ḳhud apnī jazā na ho jaa.e

qadam qadam pe bapā jashn-e-imtihān-e-vafā

tirī tarah koī dard-āshnā na ho jaa.e

na dekh mujh ko mohabbat kī aañkh se ai dost

mirā vajūd mirā mudda.ā na ho jaa.e

maiñ jis ko DhūñD rahā huuñ nashāt-e-qurbat meñ

mire ḳhayāl se bhī māvarā bhī ho jaa.e

zamīñ kī god se sūraj nikālne vaalo

sitāra-e-saharī rahnumā na ho jaa.e

ab aur tā-ba-kujā ye hisār-e-mausam-e-dard

ab us taraf bhī darūd-e-sabā na ho jaa.e

harīm-e-jāñ meñ hai arzāñ ḳhumār-e-tīra-shabī

ye us dayār kī āb-o-havā na ho jaa.e

ġham-e-firāq meñ lazzat sahī magar 'aslam'

mirī hayāt mirā ḳhūñ-bahā na ho jaa.e

main sochta hun kahin tu KHafa na ho jae

teri ana meri zanjir-e-pa na ho jae

ye jiti-jagti aankhen ye KHwab si duniya

wufur-e-shauq KHud apni jaza na ho jae

qadam qadam pe bapa jashn-e-imtihan-e-wafa

teri tarah koi dard-ashna na ho jae

na dekh mujh ko mohabbat ki aankh se ai dost

mera wajud mera muddaa na ho jae

main jis ko DhunD raha hun nashat-e-qurbat mein

mere KHayal se bhi mawara bhi ho jae

zamin ki god se suraj nikalne walo

sitara-e-sahari rahnuma na ho jae

ab aur ta-ba-kuja ye hisar-e-mausam-e-dard

ab us taraf bhi darud-e-saba na ho jae

harim-e-jaan mein hai arzan KHumar-e-tira-shabi

ye us dayar ki aab-o-hawa na ho jae

gham-e-firaq mein lazzat sahi magar 'aslam'

meri hayat mera KHun-baha na ho jae