main taKHliq-e-sharar karta hun apne soz-e-pinhan se

maiñ taḳhlīq-e-sharar kartā huuñ apne soz-e-pinhāñ se

maiñ parvāna nahīñ jo aag luuñ har sham-e-sozāñ se

kiyā vahshat ne aql-o-ishq meñ ik rabt-e-nau paidā

ga.e vo din ke dīvāne ulajhte the garebāñ se

na jaane imtihāñ hai aaj kis kī nā-ḳhudā.ī kā

ki jo bhī mauj uThtī hai vo baḌh jaatī hai tūfāñ se

kashish manzil kī dāman khīñchtī thī varna mushkil thā

guzarnā fasl-e-gul meñ be-niyāzāna gulistāñ se

kaheñ kyā ham kahāñ aa ke tire vahshī ne dam toḌā

ḳhirad samjhā-bujhā ke le to aa.ī thī bayābāñ se

ba-qaul ustād ke 'ehsāñ' hai suunā dil kā kāshāna

chalo thoḌī sī raunaq maañg laa.eñ bazm-e-jānāñ se

main taKHliq-e-sharar karta hun apne soz-e-pinhan se

main parwana nahin jo aag lun har sham-e-sozan se

kiya wahshat ne aql-o-ishq mein ek rabt-e-nau paida

gae wo din ke diwane ulajhte the gareban se

na jaane imtihan hai aaj kis ki na-KHudai ka

ki jo bhi mauj uThti hai wo baDh jati hai tufan se

kashish manzil ki daman khinchti thi warna mushkil tha

guzarna fasl-e-gul mein be-niyazana gulistan se

kahen kya hum kahan aa ke tere wahshi ne dam toDa

KHirad samjha-bujha ke le to aai thi bayaban se

ba-qaul ustad ke 'ehsan' hai suna dil ka kashana

chalo thoDi si raunaq mang laen bazm-e-jaanan se