main tera muntazir hun jalwa-e-jaanana barson se

maiñ terā muntazir huuñ jalva-e-jānāna barsoñ se

chhalak uTThā hai mere sabr kā paimāna barsoñ se

vafā kī pāsdārī hai na jal jaane kā jazba hai

badal Daalī hai kis ne fitrat-e-parvāna barsoñ se

na lā gardish meñ us ke sāmne paimāna ai saaqī

na jaane kaun se zindāñ meñ thā dīvāna barsoñ se

unheñ isrār hai maiñ un ko ghar aane kī dāvat duuñ

kahūñ kaise unheñ ghar hai mirā vīrāna barsoñ se

qayāmat hai usī par bevafā hone kī tohmat hai

jo detā aa rahā hai jaan kā nazrāna barsoñ se

na jaane kitnī barsātoñ meñ DhūñDā hai 'qamar' ham ne

nazar aate haiñ vo mai-kash na vo mai-ḳhāna barsoñ se

main tera muntazir hun jalwa-e-jaanana barson se

chhalak uTTha hai mere sabr ka paimana barson se

wafa ki pasdari hai na jal jaane ka jazba hai

badal Dali hai kis ne fitrat-e-parwana barson se

na la gardish mein us ke samne paimana ai saqi

na jaane kaun se zindan mein tha diwana barson se

unhen israr hai main un ko ghar aane ki dawat dun

kahun kaise unhen ghar hai mera virana barson se

qayamat hai usi par bewafa hone ki tohmat hai

jo deta aa raha hai jaan ka nazrana barson se

na jaane kitni barsaton mein DhunDa hai 'qamar' hum ne

nazar aate hain wo mai-kash na wo mai-KHana barson se