main tirgi se guzarta hun raushni ki tarah

maiñ tīrgī se guzartā huuñ raushnī kī tarah

mujhe shu.ūr hai jiine kā aadmī kī tarah

yahī adā thī yahī naaz thā yahī shoḳhī

ik aur shaḳhs bhī dekhā thā aap hī kī tarah

maiñ un se mahv-e-takallum vo mujh se garm-e-suḳhan

maiñ zindagī se muḳhātib huuñ zindagī kī tarah

ḳhatā muaaf ye milnā bhī koī milnā hai

tum apne ho ke bhī milte ho ajnabī kī tarah

tirā jamāl hai ā.īna-dār-e-zāt-o-sifāt

tirā ḳhayāl hai sūraj kī raushnī kī tarah

kisī kī yaad kī ḳhushbū hai misl-e-bū-e-chaman

kisī kī zulf kā saaya hai chāñdnī kī tarah

mirī hayāt mirī kā.enāt ke mālik

maiñ chāhtā huuñ tujhe apnī zindagī kī tarah

badan mahak uThe ḳhushbu-e-yār se 'jauhar'

agar hayāt ho phūloñ kī tāzgī kī tarah

main tirgi se guzarta hun raushni ki tarah

mujhe shuur hai jine ka aadmi ki tarah

yahi ada thi yahi naz tha yahi shoKHi

ek aur shaKHs bhi dekha tha aap hi ki tarah

main un se mahw-e-takallum wo mujh se garm-e-suKHan

main zindagi se muKHatib hun zindagi ki tarah

KHata muaf ye milna bhi koi milna hai

tum apne ho ke bhi milte ho ajnabi ki tarah

tera jamal hai aaina-dar-e-zat-o-sifat

tera KHayal hai suraj ki raushni ki tarah

kisi ki yaad ki KHushbu hai misl-e-bu-e-chaman

kisi ki zulf ka saya hai chandni ki tarah

meri hayat meri kaenat ke malik

main chahta hun tujhe apni zindagi ki tarah

badan mahak uThe KHushbu-e-yar se 'jauhar'

agar hayat ho phulon ki tazgi ki tarah