main to nahin hun in ke jaisi ye to uDna jaane hain

maiñ to nahīñ huuñ in ke jaisī ye to uḌnā jaane haiñ

ye jo sab ḳhush-rañg parinde pinjre ke dīvāne haiñ

baiTh zarā ārām se dil kī Dor mujhe suljhāne de

uljhī uljhī dhaḌkan ke kamzor se taane baane haiñ

apnī ḳhaak se duur sahī par soñdhī hai hijrat kī dhuul

kahne do kahne vaalo ko duur ke Dhol suhāne haiñ

sirf ghaḌī kī Tik-Tik sunñā maut se pahle maut hai yaar

vaqt se aage baḌh kar dekho aage na.e zamāne haiñ

ḳhud ko gale se lagāyā dekhā man āñgan barsāt ke baad

dhuup sī āñkheñ damak rahī haiñ bhīge bhīge shāne haiñ

kis ko patā hai kitnā vaqt lagegā in ko bharne meñ

dard to baḌhtā hī jaatā hai lekin zaḳhm purāne haiñ

ziist kī train meñ apne apne phone uThā.e gum-sum se

jaane pahchāne rastoñ par log sabhī anjāne haiñ

tere dar par 'sīmā' 'naqvī' kyoñ aate haiñ roz ye sañg

ik tū hī dīvānī hai yā baaqī sab dīvāne haiñ

main to nahin hun in ke jaisi ye to uDna jaane hain

ye jo sab KHush-rang parinde pinjre ke diwane hain

baiTh zara aaram se dil ki Dor mujhe suljhane de

uljhi uljhi dhaDkan ke kamzor se tane bane hain

apni KHak se dur sahi par sondhi hai hijrat ki dhul

kahne do kahne walo ko dur ke Dhol suhane hain

sirf ghaDi ki Tik-Tik sunna maut se pahle maut hai yar

waqt se aage baDh kar dekho aage nae zamane hain

KHud ko gale se lagaya dekha man aangan barsat ke baad

dhup si aankhen damak rahi hain bhige bhige shane hain

kis ko pata hai kitna waqt lagega in ko bharne mein

dard to baDhta hi jata hai lekin zaKHm purane hain

zist ki train mein apne apne phone uThae gum-sum se

jaane pahchane raston par log sabhi anjaane hain

tere dar par 'sima' 'naqwi' kyon aate hain roz ye sang

ek tu hi diwani hai ya baqi sab diwane hain