main tujh par munkashif ho jaun ye mujh par garan hai

maiñ tujh par munkashif ho jā.ūñ ye mujh par garāñ hai

ḳhasāra sā ḳhasāra tā-ba-imkāñ sab ziyāñ hai

ye chashm-e-nam kī ḳhūnāba-fishānī tham rahe to

khule ashkoñ kī tuġhyānī kā sar-chashma kahāñ hai

charāġh aise tah-e-farsh-e-zamīñ rakkhe ga.e the

falak kī maañg meñ ik jhilmilātī kahkashāñ hai

tirī āñkhoñ se le kar hai shikam tak bhuuk raqsāñ

to phir nān-e-javīñ kā dā.era hī kul jahāñ hai

huī ab raftanī terī ḳhalish to kyā ye samjhūñ

ki kuchh baaqī nahīñ ab tere mere darmiyāñ hai

kiyā inkār jab qaid-e-qafas se tab khulā ye

par-e-parvāz kī had to karāñ-tā-ba-karāñ hai

tah-e-dām-e-asīrī bhī rihā.ī kī tamannā

mirī sahmī huī āñkhoñ meñ ab tak pur-fishāñ hai

kahāñ kā ishva-o-ġhamza-o-nāzish aah 'anjum'

ki merā mehrbāñ mujh par abhī nā-mehrbāñ hai

main tujh par munkashif ho jaun ye mujh par garan hai

KHasara sa KHasara ta-ba-imkan sab ziyan hai

ye chashm-e-nam ki KHunaba-fishani tham rahe to

khule ashkon ki tughyani ka sar-chashma kahan hai

charagh aise tah-e-farsh-e-zamin rakkhe gae the

falak ki mang mein ek jhilmilati kahkashan hai

teri aankhon se le kar hai shikam tak bhuk raqsan

to phir nan-e-jawin ka daera hi kul jahan hai

hui ab raftani teri KHalish to kya ye samjhun

ki kuchh baqi nahin ab tere mere darmiyan hai

kiya inkar jab qaid-e-qafas se tab khula ye

par-e-parwaz ki had to karan-ta-ba-karan hai

tah-e-dam-e-asiri bhi rihai ki tamanna

meri sahmi hui aankhon mein ab tak pur-fishan hai

kahan ka ishwa-o-ghamza-o-nazish aah 'anjum'

ki mera mehrban mujh par abhi na-mehrban hai