main tujhse jo mangun to yahi mangun ki mujhko

maiñ tujh se jo māñgūñ to yahī māñgūñ ki mujh ko

muhtāj na karnā kisī duniyāvī ḳhudā kā

duniyā ke masā.ib se agar jhukne lagūñ to

hāthoñ meñ thamā denā 'asā apnī 'atā kā

kamzor jo paḌne lage āvāz mirī to

duniyā meñ baḌhā denā asar merī sadā kā

aa jaa.e agar vaqt kaḌā pyāroñ pe mere

fazloñ meñ piro denā badan un kī du'ā kā

namnāk jo ho jā.ūñ kabhī apnoñ se maulā

āñkhoñ se miTā denā alam apne gadā kā

duniyā kī nigāhoñ se agar girne lagūñ to

'izzat ko banā denā sharaf merī qabā kā

ho jaa.eñ agar haath mire ḳhālī to maulā

kashkol meñ bhar denā bharam apnī razā kā

main tujh se jo mangun to yahi mangun ki mujh ko

muhtaj na karna kisi duniyawi KHuda ka

duniya ke masaib se agar jhukne lagun to

hathon mein thama dena 'asa apni 'ata ka

kamzor jo paDne lage aawaz meri to

duniya mein baDha dena asar meri sada ka

aa jae agar waqt kaDa pyaron pe mere

fazlon mein piro dena badan un ki du'a ka

namnak jo ho jaun kabhi apnon se maula

aankhon se miTa dena alam apne gada ka

duniya ki nigahon se agar girne lagun to

'izzat ko bana dena sharaf meri qaba ka

ho jaen agar hath mere KHali to maula

kashkol mein bhar dena bharam apni raza ka