میں تجھ سے جو مانگوں تو یہی مانگوں کہ مجھ کو (ردیف .. ا)

میں تجھ سے جو مانگوں تو یہی مانگوں کہ مجھ کو

محتاج نہ کرنا کسی دنیاوی خدا کا

دنیا کے مصائب سے اگر جھکنے لگوں تو

ہاتھوں میں تھما دینا عصا اپنی عطا کا

کمزور جو پڑنے لگے آواز مری تو

دنیا میں بڑھا دینا اثر میری صدا کا

آ جائے اگر وقت کڑا پیاروں پہ میرے

فضلوں میں پرو دینا بدن ان کی دعا کا

نمناک جو ہو جاؤں کبھی اپنوں سے مولا

آنکھوں سے مٹا دینا الم اپنے گدا کا

دنیا کی نگاہوں سے اگر گرنے لگوں تو

عزت کو بنا دینا شرف میری قبا کا

ہو جائیں اگر ہاتھ مرے خالی تو مولا

کشکول میں بھر دینا بھرم اپنی رضا کا