main us ka nam ghule paniyon pe likhta kya

maiñ us kā naam ghule pāniyoñ pe likhtā kyā

vo ek mauj-e-ravāñ hai kahīñ pe ruktā kyā

tamām harf mire lab pe aa ke jam se ga.e

na jaane maiñ ne kahā kyā aur us ne samjhā kyā

sabhoñ ko apnī ġharaz thī sabhoñ ko apnī baqā

mire liye mire nazdīk koī aatā kyā

ubhartā chāñd mirā ham-safar thā dariyā meñ

maiñ Dūbte hue sūraj ko muḌ ke taktā kyā

parinde ghar kī muñDeroñ pe aa ke baiTh ga.e

maiñ ajnabī thā ishāra koī samajhtā kyā

firāq o vasl to tasvīreñ un ke naam kī haiñ

maiñ in meñ rañg kisī ke lahū se bhartā kyā

maiñ apne ghar meñ nahīñ thā magar kahīñ bhī na thā

udhar se mujh ko guzarte kisī ne dekhā kyā

tamām shahr ravāñ hai mire ta.āqub meñ

maiñ aap kyā mire ghar kī taraf ko rastā kyā

ye raushnī kabhī pahle na thī yahāñ 'aḳhtar'

sitāra raat kī palkoñ pe koī chamkā kyā

main us ka nam ghule paniyon pe likhta kya

wo ek mauj-e-rawan hai kahin pe rukta kya

tamam harf mere lab pe aa ke jam se gae

na jaane main ne kaha kya aur us ne samjha kya

sabhon ko apni gharaz thi sabhon ko apni baqa

mere liye mere nazdik koi aata kya

ubharta chand mera ham-safar tha dariya mein

main Dubte hue suraj ko muD ke takta kya

parinde ghar ki munDeron pe aa ke baiTh gae

main ajnabi tha ishaara koi samajhta kya

firaq o wasl to taswiren un ke nam ki hain

main in mein rang kisi ke lahu se bharta kya

main apne ghar mein nahin tha magar kahin bhi na tha

udhar se mujh ko guzarte kisi ne dekha kya

tamam shahr rawan hai mere taaqub mein

main aap kya mere ghar ki taraf ko rasta kya

ye raushni kabhi pahle na thi yahan 'aKHtar'

sitara raat ki palkon pe koi chamka kya