main uski baat ke lahje ka etibar karun

maiñ us kī baat ke lahje kā e'tibār karūñ

karūñ ki us kā na maiñ aaj intizār karūñ

maiñ sirf saaya huuñ apnā magar ye zid hai mujhe

ki apne-āp ko ḳhud se alag shumār karūñ

ajab mizāj hai us kā bhī chāhtā hai ki maiñ

ba-taur-e-vaz.a faqat ḳhud ko iḳhtiyār karūñ

maiñ ik athāh samundar huuñ is ḳhayāl meñ ġharq

ki Duub jā.ūñ maiñ ḳhud meñ ki ḳhud ko paar karūñ

ḳhud apne-āp se milne ke vāste pahle

maiñ apne-āp ko dariyā se ābshār karūñ

maiñ us kī dhuup huuñ jo merā āftāb nahīñ

ye baat ḳhud pe maiñ kis tarah āshkār karūñ

kisī qadīm kahānī meñ ek muddat se

vo so rahā hai ki maiñ us ko hoshiyār karūñ

phir ek aas kī chilman se umr bhar lag ke

ḳhud apne paañv kī aahaT kā intizār karūñ

main us ki baat ke lahje ka e'tibar karun

karun ki us ka na main aaj intizar karun

main sirf saya hun apna magar ye zid hai mujhe

ki apne-ap ko KHud se alag shumar karun

ajab mizaj hai us ka bhi chahta hai ki main

ba-taur-e-waza faqat KHud ko iKHtiyar karun

main ek athah samundar hun is KHayal mein gharq

ki Dub jaun main KHud mein ki KHud ko par karun

KHud apne-ap se milne ke waste pahle

main apne-ap ko dariya se aabshaar karun

main us ki dhup hun jo mera aaftab nahin

ye baat KHud pe main kis tarah aashkar karun

kisi qadim kahani mein ek muddat se

wo so raha hai ki main us ko hoshiyar karun

phir ek aas ki chilman se umr bhar lag ke

KHud apne panw ki aahaT ka intizar karun