main usko sochun shab-o-roz bandagi ki tarah

maiñ us ko sochūñ shab-o-roz bandagī kī tarah

haiñ us kī yādeñ dil-e-zār par namī kī tarah

kaTegā kaise bhalā arsa-e-hayāt batā

tire binā to har ik pal huā sadī kī tarah

mujhe to ġham meñ bhī lazzat sadā huī mahsūs

hai rab kā shukr mujhe ġham diyā ḳhushī kī tarah

hamesha dil meñ ġhamoñ kā hai madd-o-jazr magar

nazar meñ aatī huuñ Thahrī huī nadī kī tarah

kahūñ jo sher to āñkheñ chamakne lagtī haiñ

mujhe to shā.erī lagtī hai raushnī kī tarah

vo shaḳhs jis pe luTā dī ḳhulūs kī daulat

vo ab mile bhī to miltā hai ajnabī kī tarah

agar vo pyaar se sairāb kar de dil kī zamīñ

har ek zaḳhm-e-jigar khil uThe kalī kī tarah

ba-vaqt-e-naza.a vo aa.e qarīb 'azkā' ke

qazā bhī lagne lagī us ko zindagī kī tarah

main us ko sochun shab-o-roz bandagi ki tarah

hain us ki yaaden dil-e-zar par nami ki tarah

kaTega kaise bhala arsa-e-hayat bata

tere bina to har ek pal hua sadi ki tarah

mujhe to gham mein bhi lazzat sada hui mahsus

hai rab ka shukr mujhe gham diya KHushi ki tarah

hamesha dil mein ghamon ka hai madd-o-jazr magar

nazar mein aati hun Thahri hui nadi ki tarah

kahun jo sher to aankhen chamakne lagti hain

mujhe to shaeri lagti hai raushni ki tarah

wo shaKHs jis pe luTa di KHulus ki daulat

wo ab mile bhi to milta hai ajnabi ki tarah

agar wo pyar se sairab kar de dil ki zamin

har ek zaKHm-e-jigar khil uThe kali ki tarah

ba-waqt-e-naza wo aae qarib 'azka' ke

qaza bhi lagne lagi us ko zindagi ki tarah