main us se bichhDa to phir kis qadar akeli thi

maiñ us se bichhḌā to phir kis qadar akelī thī

vo chāñdnī jo kabhī mere saath khelī thī

kabhī kabhī baḌī shiddat se yaad aatī hai

vo niiñd jo mirī āñkhoñ kī ik sahelī thī

qadam qadam pe the jangal meñ sā.ebān bahut

magar vo chaltī huī dhuup jo akelī thī

jahāñ se maiñ ye ḳharāsheñ sajā ke laayā huuñ

mire paḌos meñ phūloñ kī ik havelī thī

badal ga.e the lakīroñ ke zāviye varna

vahī thā haath hamārā vahī hathelī thī

bhulā diyā use manzil ke paas sūraj ne

masāfatoñ kī kaḌī dhuup jis ne jhelī thī

hamāre baare meñ ā.īna sochtā hī rahā

hamārī shakl meñ shāyad koī pahelī thī

hamāre gaañv kā naqsha badal gayā varna

jahāñ babūl hai pahle vahāñ chañbelī thī

khilī huī hai vo ai 'badr' ek jangal meñ

mire vajūd ne jo chāñdnī uñDelī thī

main us se bichhDa to phir kis qadar akeli thi

wo chandni jo kabhi mere sath kheli thi

kabhi kabhi baDi shiddat se yaad aati hai

wo nind jo meri aankhon ki ek saheli thi

qadam qadam pe the jangal mein saeban bahut

magar wo chalti hui dhup jo akeli thi

jahan se main ye KHarashen saja ke laya hun

mere paDos mein phulon ki ek haweli thi

badal gae the lakiron ke zawiye warna

wahi tha hath hamara wahi hatheli thi

bhula diya use manzil ke pas suraj ne

masafaton ki kaDi dhup jis ne jheli thi

hamare bare mein aaina sochta hi raha

hamari shakl mein shayad koi paheli thi

hamare ganw ka naqsha badal gaya warna

jahan babul hai pahle wahan chanbeli thi

khili hui hai wo ai 'badr' ek jangal mein

mere wajud ne jo chandni unDeli thi