main waqif-kar-e-asrar-e-baqa hun

maiñ vāqif-kār-e-asrār-e-baqā huuñ

isī ḳhātir to un par mar-miTā huuñ

ye merī intihā-e-ārzū dekh

ki maiñ tujh se tujhī ko māñgtā huuñ

sunī jaatī nahīñ jo huuñ vo fariyād

jo rad kar dī ga.ī vo iltijā huuñ

koī nāhaq jafā.eñ kyoñ sahegā

magar maiñ huuñ ki majbūr-e-vafā huuñ

ravā hai yā ye sajda nāravā hai

kisī ke āstāñ par gir paḌā huuñ

vo apne husn kī ik dāstāñ haiñ

maiñ apne 'ishq kā ik mājrā huuñ

kahīñ hote bhī haiñ siine meñ do dil

maiñ jis ko chāhtā huuñ chāhtā huuñ

main waqif-kar-e-asrar-e-baqa hun

isi KHatir to un par mar-miTa hun

ye meri intiha-e-arzu dekh

ki main tujh se tujhi ko mangta hun

suni jati nahin jo hun wo fariyaad

jo rad kar di gai wo iltija hun

koi nahaq jafaen kyon sahega

magar main hun ki majbur-e-wafa hun

rawa hai ya ye sajda narawa hai

kisi ke aastan par gir paDa hun

wo apne husn ki ek dastan hain

main apne 'ishq ka ek majra hun

kahin hote bhi hain sine mein do dil

main jis ko chahta hun chahta hun